Esta licenza permite o uso de fontes dixitais en sitios web, para seren mostradas en calquera navegador. As fontes cárganse dinamicamente a través da Internet e poden estar aloxadas nun servidor propio ou no da fundición. Esta segunda opción xera unha relación de dependencia coa fundición.
O uso web cuantifícase principalmente polo tráfico do sitio (visualizacións de páxina ou visitantes), 76 % da mostra. Mentres que as licenzas de escritorio céntranse nos individuos que van usar a fonte, as licenzas web concéntranse en quen verá, lerá ou interactuará coa fonte nos sitios web.
Máis de metade da mostra (54 %) utiliza o número de páxinas vistas mensualmente como unidade de medida para as licenzas web. Aínda que o número de dominios aparece habitualmente combinado coa medición do tráfico, hai algúns casos (4) en que os dominios son a única métrica empregada. Moitas fundicións que usan unidades de medida máis universais —número de persoas empregadas, usuarias ou dispositivos— venden as licenzas web dentro dun paquete con varios usos.
O prezo medio dunha fonte de texto para a web é similar ao dunha de escritorio, cun rango algo máis amplo, que chega ata os 233 €. Atopamos algunhas licenzas temporais para uso web, mais continúan sendo casos excepcionais na mostra. Cinco fundicións cobran unha tarifa anual, e dúas ofrecen opcións para varios períodos de tempo.