Esta licenza permite o uso de fontes dixitais en aplicacións para mostraren o contido de maneira efectiva. Na maioría dos casos, é necesario revisar a EULA para determinar se a licenza inclúe as aplicacións de escritorio ou está restrinxida aos dispositivos móbiles. As fontes están incrustadas na aplicación e son cargadas na interface.
A licenza de aplicacións ás veces ofrécese conxuntamente como App/ePub ou App/Videoxogo. Como no caso das fundicións que teñen unha licenza separada para videoxogos observamos que as métricas e prezos coinciden cos de aplicacións, engadímolas neste mesmo bloque.
Hai unha unidade de medida predominante: o número de aplicacións que inclúen a fonte. Usamos o termo xeral «caso de uso», xa que tamén é apropiado para outras licenzas. Existen outras métricas relacionadas con quen ve/le/interactúa coa aplicación (descargas e usuarias mensuais), mais neste caso a porcentaxe na mostra é menor (19%) que nas licenzas web.
Tamén identificamos cinco fundicións que empregan o número de anos como única métrica. A mostra inclúe máis licenzas non perpetuas para aplicacións que para outros usos, con sete que cobran unha subscrición anual e oito que impoñen límites baseados no número de anos.
O custo da licenza de fontes para aplicacións adoita ser superior ao das licenzas web e de escritorio, ás veces duplicando ou mesmo multiplicando por dez o prezo base. Porén, algunhas fundicións manteñen a mesma tarifa básica. O resultado é unha ampla variedade, aínda que a maioría das fundicións manteñen os prezos por debaixo de 250 € para unha fonte de texto.