Font Licensing Mess é un proxecto de investigación independente que ten como obxectivo esclarecer un dos aspectos máis complexos e menos comprendidos da industria tipográfica actual: as licenzas tipográficas.
Ademais de nesta web, tamén podes seguirnos en Instagram @fontlicensing.
María Ramos (Santa Comba, 1982) é deseñadora e investigadora independente localizada en Santiago de Compostela. Está graduada no Máster en Deseño de Tipografías pola Universidade de Reading e é socia cofundadora da fundición tipográfica galego-sueca NM type. María publicou artigos sobre deseño e tipografía en diversos medios e impartiu numerosas conferencias en escolas de deseño e congresos profesionais. En 2021 participou como investigadora no Estudo da Economía do Deseño en Galicia e actualmente está involucrada no desenvolvemento do Arquivo do Deseño Galego AR\DE. O seu interese polas licenzas tipográficas xurdiu pola necesidade de entender as complexidades na distribución tipográfica, como creadora de tipografías e como usuaria en proxectos de deseño gráfico e editorial.
Ana Moliz (Barcelona, 1980) é deseñadora gráfica e investigadora independente localizada en Córdoba. As súas áreas de especialización inclúen o deseño editorial e a tipografía. Licenciouse en Historia pola Universidade de Granada para posteriormente especializarse en deseño. Cursou dous másteres en La Gauss: un en Deseño Gráfico e Visual e outro en Deseño Editorial e Publicacións Dixitais. Actualmente, Ana traballa como directora de arte en Buenaventura Estudio e leva máis de 10 anos impartindo clases de Deseño Visual e Tipografía en La Gauss. Tamén é cofundadora de Rayitas Azules, unha publicación dixital centrada no deseño editorial e a tipografía. Ademais, forma parte do equipo organizador do festival tipográfico Málaga Type e escribe unha columna semanal sobre tipografía para a revista de deseño Gràffica. A súa curiosidade natural e paixón pola tipografía levouna a participar activamente en proxectos como este, que lle permiten ampliar os seus coñecementos e habilidades.
Óscar Otero (Tordoia, 1979) é un deseñador e desenvolvedor web localizado en Santiago de Compostela. Ao longo da súa carreira, combinou o traballo como deseñador en diversas axencias e startups con proxectos persoais como letrag (2004–2010), unha enciclopedia online sobre tipografía, ou HA! (2016–presente), proxecto cofundado xunto con Miguel Calvo e centrado na historia da arte. Tamén impartiu charlas sobre deseño dixital e tipografía para formar tanto estudantes como empresas. De 2016 a 2018 foi presidente da Asociación Galega de Deseño e membro da Xunta Directiva durante 10 anos. Actualmente, participa no grupo de traballo do Arquivo do Deseño Galego AR\DE. Como desenvolvedor, é moi activo na comunidade de software libre, á que contribúe con proxectos como lume, un framework para crear sitios web que, “casualmente”, foi utilizado para realizar este sitio web.